O‘zbekiston Respublikasi Istiqbolli loyihalar milliy agentligi Kripto-aktivlar aylanmasi sohasida tartibga solish maxsus rejimida («tartibga solish qumdoni» maxsus rejimi) ishtirokchilarni ro‘yxatdan o‘tkazish tartibi to‘g‘risidagi nizomga (ro‘yxat raqami 3409-son, 2022 yil 30 dekabr) muvofiq, o‘g‘irlik, firibgarlik, tovlamachilik va boshqa noqonuniy xatti-harakatlar natijasida yo‘qolgan kripto-aktivlarni blokcheyn – tahlil qilish va qaytarish bo‘yicha sinov loyihasi bilan “aYEYEMERA” MCHJ ni yangi ishtirokchi sifatida ro‘yxatdan o‘tkazdi.

Pilot loyiha doirasida blokcheyn tahlillari va tekshiruvlari uchun turli xil vositalar va dasturlardan keng foydalanadi. Bunday vositalar shubhali harakatlar uchun real vaqt rejimida tranzaksiyalarni kuzatish, kripto hamyon manzillarini shubhali harakatlar bilan bog‘lash, kripto-aktivlar harakatini kuzatish, ular harakatining vizual sxemalarini yaratish, shuningdek, klasterlash, jami xarajatlar tahlili, xatti-harakatlar tahlili, vaqt tahlili, geografik tahlil va kripto hamyonlari va kripto-aktivlarining yakuniy egalarini aniqlash orqali turli xil manzillar o‘rtasidagi aloqalarni aniqlash imkonini beradi.

Maxsus rejim ishtirokchisining faoliyati FATF tavsiyalari va hujjatlarida belgilangan asosiy ustuvorliklarga mos keladi.

Maxsus rejim ishtirokchilari reyestri bilan Agentlikning rasmiy veb-saytida tanishish mumkin.