O‘zbekiston Respublikasi Istiqbolli loyihalar milliy agentligida (Agentlik) Xalqaro moliya korporatsiyasi (IFC) va Moody's Rating reyting agentligi bilan birgalikda tashkil etilgan “O‘zbekistonda ipoteka bilan ta’minlangan qimmatli qog‘ozlarni joriy etish: qonunchilik bazasi” mavzusida davra suhbati bo‘lib o‘tdi.

Davra suhbatida Markaziy bank, “Toshkent” RFB, “Markaziy depozitariy” AJ, banklar, yirik emitentlar vakillari, shuningdek, kapital bozori sohasi mutaxassislari ishtirok etdi. Keng doiradagi soha vakillarining ishtiroki yangi moliyaviy vositalarni joriy etishning asosiy jihatlarini ko‘p tomonlama muhokama qilish imkonini berdi.

“Bugungi tadbir eng dolzarb muammolardan biri – O‘zbekistonda ipoteka bilan ta’minlangan qimmatli qog‘ozlarni joriy etish masalasiga bag‘ishlangan. Aholini uy-joy bilan ta’minlash masalasi ustuvor vazifaga aylanib bormoqda va bunda ipoteka kreditlarini moliyalashtirishning yangi mexanizmlarini joriy etish hamda o‘z vazifalarini samarali amalga oshirish maqsadida tijorat banklari va butun moliya tizimi uchun resurslarni shakllantirish muhim o‘rin tutadi.

Barchangizga ma’lumki, Agentlik tomonidan “Kapital bozori to‘g‘risida”gi qonun loyihasi ishlab chiqilgan. Ushbu loyihaning boblaridan biri esa sekyuritizatsiya va ipoteka obligatsiyalarini joriy etishga bag‘ishlangan. Bundan tashqari, Agentlik Markaziy bank, Iqtisodiyot va moliya vazirligi bilan birgalikda O‘zbekiston Respublikasi Prezidenti Administratsiyasi bilan kelishilgan holda, shuningdek, O‘zbekiston Respublikasi Prezidentining Farmoni loyihasini tayyorlamoqda. O‘zbekiston Respublikasida ipoteka obligatsiyalarini joriy etish bo‘yicha ustuvor qadamlarni belgilashi lozim”, — dedi agentlik direktorining birinchi o‘rinbosari Vyacheslav Pak.

Davra suhbatining asosiy maqsadi ipoteka krediti bilan ta’minlangan turar-joy qimmatli qog‘ozlari (RMBS)ning asosiy jihatlarini muhokama qilish, shuningdek, “Kapital bozori to‘g‘risida”gi O‘zbekiston Respublikasi Qonuni loyihasini tahlil qilishdan iborat. Ishtirokchilar ta’minlangan obligatsiyalar va ipoteka bilan ta’minlangan qimmatli qog‘ozlarni joriy etishning huquqiy asoslarini yaratish nafaqat moliya sohasini rivojlantirish, balki fuqarolarning turmush sharoitini yaxshilashga xizmat qilayotganini ta’kidladilar.

Muhokama davomida ekspertlar reyting agentligining qoplangan obligatsiyalar va ipoteka bilan ta’minlangan qimmatli qog‘ozlar bilan bog‘liq risklarni baholash metodologiyasini taqdim etdi. Shuningdek, investorlar uchun ishonchliligi va jozibadorligini ta’minlaydigan ushbu moliyaviy vositalarni tahlil qilish bo‘yicha yondashuvlar ham ko‘rib chiqildi.

Davra suhbati ishtirokchilari O‘zbekistonda ipoteka qimmatli qog‘ozlarining joriy etilishi uy-joy qurilishini moliyalashtirishda yangi imkoniyatlar yaratishi hamda mamlakatimizning xalqaro moliya bozorlariga integratsiyalashuvi yo‘lidagi muhim qadam bo‘lishini alohida ta’kidladi. Amaldagi qonunchilikka taklif etilayotgan o‘zgartirishlarni muhokama qilish mavjud bo‘shliqlarni bartaraf qiladi va bozorni yangi vositalarni joriy etishga tayyorlaydi.

Davra suhbati O‘zbekistonda kapital bozorini rivojlantirish, shuningdek, ipoteka qimmatli qog‘ozlarini joriy etish bo‘yicha huquqiy-meyoriy muhitni takomillashtirishga qaratilgan kelgusidagi chora-tadbirlar bo‘yicha tavsiyalar ishlab chiqish bilan yakunlandi.