Ўзбекистон Республикаси Истиқболли лойиҳалар миллий агентлиги (кейинги ўринларда – Агентлик) томонидан крипто-активлар айланмаси соҳасини тартибга солиш тизимини такомиллаштириш бўйича ишлар давом эттирилмоқда.

Крипто-активлар айланмаси соҳасидаги хизмат кўрсатувчи провайдерлар, хусусан крипто-биржалар ва крипто-дўконлар фаолияти таҳлили уларнинг етарли даражада рентабеллигини кўрсатди. Шу муносабат билан, давлат бюджетига қўшимча маблағлар тушумини таъминлаш мақсадида Агентлик директорининг 2024 йил 5 мартдаги 17-сонли “Крипто-активлар айланмаси соҳасидаги фаолиятни амалга ошириш учун йиғимлар миқдорини белгилаш, уларни тўлаш ва тақсимлаш тартиби тўғрисидаги низомнинг 2-бандига ўзгартиришлар киритиш ҳақида”ги қарорига мувофиқ Крипто-активлар айланмаси соҳасидаги фаолиятни амалга ошириш учун йиғимлар миқдорини белгилаш, уларни тўлаш ва тақсимлаш тартиби тўғрисидаги Низомга (АВ томонидан 2022 йил 28 сентябрда рўйхатдан ўтказилди, рўйхат рақами 3388) крипто-биржа (400 БҲМ дан 740 БҲМ гача) ва крипто-дўкон (20 БҲМ дан 185 БҲМ гача) учун йиғимлар миқдори оширилишини назарда тутувчи ўзгартиришлар киритилди.

Таъкидлаш жоизки, киритилаётган ўзгартиришлар давлат бюджетига тушумларни камида 2 баробар ошириш имконини бериб, шу билан бирга хизмат кўрсатувчи провайдерларнинг молиявий ҳолатига жиддий салбий таъсир кўрсатмайди.

Мазкур ўзгартиришлар расмий эълон қилинган санадан уч ой ўтгач кучга киради.