Ўзбекистон Республикаси Истиқболли лойиҳалар миллий агентлиги -
крипто-активлар айланмаси, капитал бозори, суғурта, электрон тижорат, лотерея ташкил этиш ва букмекерлик фаолияти соҳаларини тартибга солиш, лицензиялаш ва рухсат бериш тартиб-таомилларини амалга ошириш бўйича ваколатли давлат ташкилоти.
Ўзбекистон Республикаси Истиқболли лойиҳалар миллий агентлиги (кейинги ўринларда – Агентлик) томонидан крипто-активлар айланмаси соҳасини тартибга солишни такомиллаштириш бўйича доимий асосда ишлар олиб борилмоқда.
Хусусан, Ўзбекистон Республикаси Президентининг 2026 йил 17 апрелдаги “Қорақалпоғистон Республикасида махсус майнинг зонасини ташкил этиш ва унинг фаолиятини йўлга қўйиш чора-тадбирлари тўғрисида”ги 143-сон қарори билан “Besqala Mining Valley” махсус майнинг зонасини ташкил этиш, шунингдек, Қорақалпоғистон Республикасининг инвестициявий жозибадорлигини ошириш ва янги иш ўринларини яратиш орқали аҳоли даромадларини кўпайтириш мақсадида ушбу зона резидентлари учун бир қатор имтиёз ва преференциялар тақдим этилиши назарда тутилган.
Бундан ташқари, мазкур қарор билан халқаро стандартлар, хусусан, Жиноий даромадларни легаллаштиришга қарши курашиш бўйича молиявий чоралар ишлаб чиқувчи гуруҳ (ФАТФ) Тавсияларининг жиноий унсурларни крипто-активлар айланмаси соҳасидаги хизматлар провайдерлари (кейинги ўринларда – хизматлар провайдерлари) бошқаруви ва эгалигига йўл қўймаслик бўйича талаблари имплементациясини таъминлаш мақсадида хизматлар провайдерларининг фаолиятини амалга оширишга доир лицензия талаблари ва шартларига ўзгартиришлар киритилди.
Агентлик директорининг 2026 йил 15 июндаги 20-сон буйруғи билан Крипто-активлар айланмаси соҳасидаги хизматлар провайдерлари фаолиятини лицензиялаш тартиби тўғрисидаги низомга (рўйхат рақами 3380, 2022 йил 15 август) қуйидагиларни назарда тутувчи ўзгартириш ва қўшимчалар киритилди:
– жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролларини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатларда доимий яшаётган, бўлиб турган ёки рўйхатга олинган шахслар томонидан хизматлар провайдерларига бошқаришни, шунингдек, ушбу шахсларнинг хизматлар провайдерлари устав жамғармасида иштирок этишини тақиқлаш;
– лицензиатнинг устав жамғармасидаги улушини жисмоний ва юридик шахсларга, шу жумладан норезидентларга реализация қилишни лицензияловчи орган билан келишиш;
– лицензиатнинг раҳбарияти (директор ва унинг ўринбосарлари), шунингдек жиноий фаолиятдан олинган даромадларни легаллаштириш, терроризм, оммавий қирғин қуролларини тарқатиш, уларни молиялаштиришга қарши курашиш бўйича таркибий бўлинма раҳбарини алмаштириш масаласини лицензияловчи орган билан келишиш.
Мазкур ўзгартириш ва қўшимчалар Ўзбекистон Республикаси Адлия вазирлиги томонидан 2026 йил 29 июнда рўйхатдан ўтказилди ва улар расман эълон қилинган кундан эътиборан уч ой ўтгач кучга киради.
