2023 йил 25 май куни Ишончли блокчейн-иловалари халқаро ассоциацияси – International Association of Trusted Blockchain Applications (INATBA) Ҳукумат маслаҳат органи (ҲМО)нинг 7-чи йиғилиши бўлиб ўтди. Унда Ўзбекистон Республикаси Истиқболли лойиҳалар миллий агентлиги (Агентлик) вакиллари иштирок этдилар. INATBA ҲМО – бу маълумотларнинг тақсимланган реестри технологиясини жорий этиш ва ривожлантириш ҳамда крипто-активлар айланмаси соҳаларини тартибга солувчи органлар, давлат органлари ва бошқа халқаро ташкилотлари ўртасидаги кўп томонлама мулоқот майдони ҳисобланади. Бугунги кунда AҚШ Федерал резерв тизими, Япониянинг Иқтисодиёт, савдо ва саноат вазирлиги, Германиянинг Иқтисодиёт ва иқлимни муҳофаза қилиш федерал вазирликлари ва бошқалар INATBA ҲМО аъзолари қаторидан жой олганлар.

Агентлик вакили крипто-активлар айланмаси соҳасини ҳуқуқий тартибга солиш соҳасида Ўзбекистонда амалга оширилаётган ислоҳотлар ҳақида йиғилиш қатнашчиларига маъруза қилди. Хусусан, Махсус режим доирасида маълумотларнинг тақсимланган реестридан фойдаланган ҳолда ишлаб чиқилаётган лойиҳалар, Ўзбекистонда крипто-активлар айланмаси соҳасидаги хизмат провайдерлари учун яратилган шарт-шароитлар ва халқаро ташкилотлар билан ҳамкорлик тўғрисида маълумот берилди.

Маълумот учун:

2022 йил октябрь ойида Истиқболли лойиҳалар миллий агентлиги INATBA Директорлари Кенгашининг таклифига биноан ҲМОнинг расмий аъзоси этиб қабул қилинди.

INATBA – бу истиқболли рақамли технологияларни фаол ривожлантириш ва жорий этишга кўмаклашиш мақсадида 2019 йилда ташкил этилган ва халқаро тан олинган тузилма ҳисобланади.

Aгентликнинг INATBA ҲМОга аъзо бўлиши халқаро ҳамкорликни кенгайтириш, хорижий давлатларнинг тартибга солувчи органлари ва хусусий сектор вакиллари билан тўғридан-тўғри мулоқотни ташкил этишга, крипто-активлар айланмаси соҳасини ҳуқуқий тартибга солиш ва маълумотларнинг тақсимланган реестри (“блокчейн”) технологиясини жорий этиш соҳасида илғор тажриба алмашишга хизмат қилади.