Истиқболли лойиҳалар миллий агентлиги вакиллари “Рақамли Қирғизистон” концепциясини амалга ошириш, жумладан, инновацион технологияларни давлат органлари, банклар, финтех ва чакана савдода жорий этиш мақсадида ташкил этилган Digital Kyrgyzstan халқаро ПЛАС-форумида иштирок этди.

Агентликнинг Крипто-активлар айланмаси соҳасини ривожлантириш бошқармаси бошлиғи Асқаржон Зокиров форумда маъруза қилиб, унда Ўзбекистоннинг крипто-активлар айланмаси соҳасини ривожлантириш ва тартибга солиш борасидаги тажрибаси ҳақида батафсил тўхталиб ўтди. Хусусан, Агентликнинг устувор вазифалари ва фаолият йўналишлари, меъёрий-ҳуқуқий ҳужжатларда белгиланган асосий меъёрлар, Республикада соҳани институционал ривожлантириш масалалари ҳақида маълумот берди.

Форумда давлат сектори, финтех компаниялари, стартаплар, венчур фондлари, хорижий ва маҳаллий банклар ва микромолия институтлари, IТ-ечимларнинг халқаро ишлаб чиқарувчилари, тўлов тизимлари ва алоқа операторлари, назорат қилувчи органлар ва уюшмалар, топ-менежмент экспертларидан иборат 800 дан ортиқ делегатлар иштирок этди.