Istiqbolli loyihalar milliy agentligi vakillari “Raqamli Qirg‘iziston” konsepsiyasini amalga oshirish, jumladan, innovatsion texnologiyalarni davlat organlari, banklar, fintex va chakana savdoda joriy etish maqsadida tashkil etilgan Digital Kyrgyzstan xalqaro PLAS-forumida ishtirok etdi.

Agentlikning Kripto-aktivlar aylanmasi sohasini rivojlantirish boshqarmasi boshlig‘i Asqarjon Zokirov forumda ma’ruza qilib, unda O‘zbekistonning kripto-aktivlar aylanmasi sohasini rivojlantirish va tartibga solish borasidagi tajribasi haqida batafsil to‘xtalib o‘tdi. Xususan, Agentlikning ustuvor vazifalari va faoliyat yo‘nalishlari, meyoriy-huquqiy hujjatlarda belgilangan asosiy meyorlar, Respublikada sohani institutsional rivojlantirish masalalari haqida ma’lumot berdi.

Forumda davlat sektori, fintex kompaniyalari, startaplar, venchur fondlari, xorijiy va mahalliy banklar va mikromoliya institutlari, IT-yechimlarning xalqaro ishlab chiqaruvchilari, to‘lov tizimlari va aloqa operatorlari, nazorat qiluvchi organlar va uyushmalar, top-menejment ekspertlaridan iborat 800 dan ortiq delegatlar ishtirok etdi.