O‘zbekiston fond bozorining IT infratuzilmasining Bloomberg moliyaviy-iqtisodiy axborot agentligi platformasi bilan integratsiyasi yakunlandi. Ushbu integratsiya tufayli “Toshkent” Respublika fond birjasida (“Toshkent” RFB) sotiladigan aksiyalar va obligatsiyalar bozori ma’lumotlari endi butun dunyo bo‘ylab Bloomberg terminali foydalanuvchilari uchun mavjud.

Loyihaning tashabbuskori va texnik ijrochisi O‘zbekiston fond bozorining IT-infratuzilmasi uchun mas’ul bo‘lgan “Qimmatli qog‘ozlar bozori axborot-resurs markazi” DUK bo‘ldi. “Toshkent” fond birjasi va Bloomberg platformasi ma’lumotlarining integratsiyasi orqali real vaqt rejimida bozor ma’lumotlarini, jumladan kotirovkalar, buyurtmalar kitoblari va boshqa asosiy ko‘rsatkichlarni yanada kengaytirish va yangi axborot bloklarini qo‘shish imkoniyati bilan uzatish mumkin.

Bloomberg platformasi bilan ma’lumotlar integratsiyasi xalqaro investorlar uchun yangi imkoniyatlar ochadi, O‘zbekiston fond bozoridan xabardorlik va unga nisbatan ishonchni oshiradi. Bu Istiqbolli loyihalar milliy agentligi (Agentlik)ning mamlakatimizda shaffof, raqobatbardosh va global yo‘naltirilgan kapital bozorini yaratish bo‘yicha strategik dasturi doirasidagi muhim qadamdir.

“Agentlik fond bozorini tartibga soluvchi organ sifatida Bloomberg bilan O‘zbekiston fond bozorining milliy resurs va axborot tizimi bilan o‘zaro hamkorlik qilish tashabbusini faol qo‘llab-quvvatlaydi. Ishonchim komilki, ushbu integratsiya xalqaro investorlarga muhim ma’lumotlardan ishonchli foydalanish imkoniyatini beradi va kelgusida mavjud to‘siqlarni yengib o‘tishga, mamlakatimizda dinamik, barqaror va shaffof kapital bozorini yaratishga xizmat qiladi”, — dedi Agentlik direktorining birinchi o‘rinbosari Vyacheslav Pak Toshkent fond birjasi va Bloomberg platformasi ma’lumotlarini integratsiyalashuvi yakunlanishi munosabati bilan o‘tkazilgan tantanali tadbirdagi nutqida.

“Toshkent” RFB boshqaruvi raisi Georgiy Paresishvilining ta’kidlashicha, “Biz xalqaro investorlarning O‘zbekiston bozoriga qiziqishi ortib borayotganini ko‘ryapmiz. Bloomberg terminali orqali bozor ma’lumotlarini taqdim etish O‘zbekistonning jahon moliyaviy ekotizimiga integratsiyalashuvi yo‘lidagi navbatdagi qadamdir. Qimmatli qog‘ozlarimiz to‘g‘risidagi ma’lumotlarning global platformada mavjudligi mamlakatimiz iqtisodiyotiga xorijiy investitsiyalar hajmini oshirishga xizmat qilishiga ishonamiz”.

“Qimmatli qog‘ozlar bozori axborot-resurs markazi” davlat unitar korxonasi nafaqat Bloomberg platformasi bilan integratsiyalashgan, balki keyingi innovatsiyalarni qo‘llab-quvvatlashga mo‘ljallangan yagona IT tizimini joriy qilishni ta’minladi. Yangi infratuzilma quyidagilarni ta’minlaydi:

• Qimmatli qog‘ozlar va obligatsiyalar uchun kotirovka va buyurtma kitoblariga to‘liq kirish.
• Yangi moliyaviy vositalar va ma’lumotlarni qo‘shish uchun masshtablashtirish.
• Xalqaro standartlarga muvofiqlikni ta’minlovchi shaffof boshqaruv mexanizmlari.

Bloomberg Global ma’lumotlar bo‘yicha bosh direktori Devid Tamburelli aloxida to‘xtalib o‘tdi: “RSET O‘zbekiston kompaniyalarining aksiyalari va mahalliy obligatsiyalarini sotadigan yagona birja bo‘lib, shaffoflik, listing kompaniyalarining korporativ boshqaruvi va xorijiy investorlar uchun kirish imkoniyatlari bo‘yicha sezilarli yutuqlarga erishdi. Biz O‘zbekiston kapital bozorlarining rivojlanishini qo‘llab-quvvatlaymiz va mijozlarimizga ushbu chegaraviy bozor ma’lumotlarini taqdim etish uchun birja ma’lumotlarini taklif qilishni kengaytirishdan mamnunmiz”.

Ushbu loyiha O‘zbekistonni mintaqaviy moliyaviy markazga aylantirish bo‘yicha keng tashabbusning bir qismidir. Endi xorijlik investorlar real vaqt rejimida olingan ishonchli ma’lumotlarga asoslanib investitsiya qarorlarini qabul qilishlari mumkin bo‘ladi.

O‘zbekiston fond bozori uchun mazkur qadam likvidlikni sezilarli darajada oshirish, xalqaro investorlar bazasini kengaytirish va jahon moliya bozorlariga integratsiyalashuvni jadallashtirish istiqbollarini ochadi.