Ўзбекистон Республикаси Истиқболли лойиҳалар миллий агентлиги

Бирлашган Миллатлар Ташкилотининг Тараққиёт Дастури (БМТТД) Ўзбекистон Республикаси Истиқболли лойиҳалар миллий агентлиги (Агентлик) билан биргаликда 2025 йилнинг 25-26 июнь кунлари Тошкент шаҳрида “Такафулни амалиётга татбиқ этиш” мавзусида тренинг ташкил этди.

Тренингда суғурта бозорини тартибга солувчи орган, турли давлат ташкилотлари ҳамда Ўзбекистон суғурта соҳаси вакиллари иштирок этди. Тренингни ўтказиш учун такафул суғуртаси бўйича катта тажрибага эга индонезиялик халқаро эксперт Эрвин Ноэкман таклиф этилди. Икки кун давомида тренинг иштирокчилари такафул моделлари, меъёрий-ҳуқуқий ва шариат асослари, шартнома тузилмалари, операцион тузилма ва такафулга оид бошқа мавзулар билан танишадилар.

“Суғурта салоҳиятини ошириш Ўзбекистонда суғурта соҳаси ривожланишининг асосидир. Такафул суғуртаси Ўзбекистон аҳолисини турли хавф-хатарлардан ҳимоя қилишга қаратилган суғурта соҳасини ривожлантириш ва диверсификация қилишнинг ўзига хос ва барқарор йўлини таъминлайди, шу боис тренингда қатнашиш Ўзбекистон суғурта бозори вакиллари учун жуда фойдали ва муҳим”, – деди Агентлик Суғурта бозорини ривожлантириш бошқармаси бошлиғи Отабек Ёқубов ўз нутқида.

Тренинг Германия ҳукумати томонидан молиялаштирилган БМТ Тараққиёт дастурининг “Ўзбекистонда суғурта рискларини молиялаштириш (IRFF)” глобал лойиҳаси томонидан қўллаб-қувватланди, унинг асосий мақсади лойиҳада иштирок этаётган мамлакатларни Ўзбекистон суғурта бозорини ривожлантиришда қўллаб-қувватлаш, жумладан: суғурта сиёсатини мамлакатнинг иқтисодий ривожланиш дастурига интеграциялаш, инклюзив суғуртани ривожлантириш, суверен хавфлар, табиий офатлардан келиб чиқадиган хавфларни молиялаштириш, қўшимча инвестицияларни суғурталаш ва ҳ.к.

Маълумот учун: Такафул – ўзаро ёрдам ва ҳамкорликка асосланган, шариат тамойиллари доирасида фаолият юритувчи исломий суғурта тизими. Бу кооператив тизим бўлиб, унда иштирокчилар анъанавий суғурта моделига таянмасдан, маълум рискларга нисбатан бир-бирларини қўллаб-қувватлаш учун ўз ресурсларини бирлаштирадилар.