Ўзбекистон Республикаси Истиқболли лойиҳалар миллий агентлиги -
крипто-активлар айланмаси, капитал бозори, суғурта, электрон тижорат, лотерея ташкил этиш ва букмекерлик фаолияти соҳаларини тартибга солиш, лицензиялаш ва рухсат бериш тартиб-таомилларини амалга ошириш бўйича ваколатли давлат ташкилоти.
2022 йил 1 ноябрь куни Тошкент шаҳридаги Сингапур менежментни ривожлантириш институтида “Агентлик раҳбарияти ҳамда талабалар ўртасида Ўзбекистон Республикасида крипто-активлар айланмаси соҳасини ривожлантириш масалалари” мавзусида учрашув бўлиб ўтди.
Учрашув крипто-активлар айланмаси соҳасини ривожлантириш борасида Ўзбекистонда амалга оширилаётган ислоҳотларнинг мазмун-моҳиятини талабаларга етказиш мақсадида ташкил этилди.
Жумладан, Агентлик раҳбарияти томонидан республикада мазкур соҳани тартибга солувчи қабул қилинган норматив-ҳуқуқий ҳужжатлар, шунингдек, мамлакатимизга инвестицияларни жалб этишнинг янги механизмларини ишлаб чиқиш бўйича кўрилаётган чора-тадбирлар юзасидан батафсил тушунтиришлар берилди.
Учрашув давомида Агентлик ходимлари томонидан институт талабалари учун тақдимот ўтказилди.
Талабаларни қизиқтирган асосий саволлар Ўзбекистон Республикасида крипто-активлар айланмаси соҳасида майнинг фаолиятини ташкил этиш, бу соҳада хизмат кўрсатувчи провайдерлар, яқин даврда крипто-активлар айланмаси соҳасида хизматлар кўрсатувчи хорижий электрон платформаларга киришнинг блокланиши, ўзгартирилмайдиган токенларни (NFT) яратиш ва кейинчалик уларни крипто-активлар айланмасига чиқариш усуллари йўналишида бўлди.
Учрашув якуни бўйича талабалар ўзларини қизиқтирган барча саволларга жавоб олдилар ва улар томонидан келгусида ҳам бундай учрашувларни ташкил этишни таклифи билдирилди.
Идоравий мансуб ташкилотлар
FAQ
