Ўзбекистон Республикаси Истиқболли лойиҳалар миллий агентлиги -
крипто-активлар айланмаси, капитал бозори, суғурта, электрон тижорат, лотерея ташкил этиш ва букмекерлик фаолияти соҳаларини тартибга солиш, лицензиялаш ва рухсат бериш тартиб-таомилларини амалга ошириш бўйича ваколатли давлат ташкилоти.
Истиқболли лойиҳалар миллий агентлиги ходимлари 1-2 октябрь кунлари Сингапурда бўлиб ўтган дунёнинг етакчи крипто-тадбири бўлмиш TOKEN2049 конференциясида иштирок этдилар.
Тадбир рақамли активлар саноатининг сўнгги тенденциялари ва келажагини муҳокама қилиш учун асосий халқаро платформа ҳисобланади.
TOKEN2049 ҳар йили етакчи глобал экспертлар, тадбиркорлар, инвесторлар, дастурчилар, Web3 ва блокчейн технологиялари бўйича тартибга солувчи орган вакилларини бирлаштиради.
Бу йил тадбир 150 дан ортиқ мамлакатдан 20 000 дан ортиқ иштирокчиларни жалб қилди, бу эса унинг глобал аҳамиятидан далолат беради.
Конференция дастури марказлашмаган молияни (DeFi) ривожлантириш, крипто-активлар учун меъёрий-ҳуқуқий база, турли иқтисодиёт тармоқларида тақсимланган китоблар технологиясини (блокчейн) жорий этиш, шунингдек, энг сўнгги протоколлар ва технологик инновациялар каби кенг кўламли долзарб мавзуларни ўз ичига олади.
Агентлик ходимлари учун Ўзбекистонда крипто-активлар айланмаси бўйича давлат регулятори вакиллари сифатида бундай тадбирда иштирок этиш қуйидаги имкониятларни беради:
- крипто-активлар бозори, web3 ва сунъий интеллектни тартибга солиш ва назорат қилиш бўйича етакчи халқаро тажрибаларни ўрганиш;
- бозорнинг асосий иштирокчилари ва бошқа юрисдикциялардаги регуляторлар вакиллари билан фикр алмашиш;
- институционал бозор иштирокчиларини жалб қилиш ва улар билан муносабатларни ўрнатиш;
- соҳадаги энг янги технологик ютуқлар ва инновацион лойиҳалар билан танишиш;
- халқаро майдонда Ўзбекистоннинг имижини тарғиб қилиш ва инвестицион ва технологик салоҳиятини тақдим этиш ва ҳ.к.
TOKEN2049да иштирок этиш Агентликка жаҳон тенденцияларидан хабардор бўлиш ва Ўзбекистон Республикасида крипто-активлар бозорини ривожлантириш ва тартибга солиш, унинг хавфсизлиги, шаффофлиги ва глобал крипто экотизимига интеграциялашувини таъминлаш бўйича етакчи халқаро тажрибаларни қўллаш имконини беради.
Идоравий мансуб ташкилотлар
