Ўзбекистон Республикаси Истиқболли лойиҳалар миллий агентлиги -
крипто-активлар айланмаси, капитал бозори, суғурта, электрон тижорат, лотерея ташкил этиш ва букмекерлик фаолияти соҳаларини тартибга солиш, лицензиялаш ва рухсат бериш тартиб-таомилларини амалга ошириш бўйича ваколатли давлат ташкилоти.
Ўзбекистон Республикаси Истиқболли лойиҳалар миллий агентлиги (кейинги ўринларда –Агентлик деб юритилади) крипто-активларнинг ноқонуний айланмасини аниқлаш ва олдини олиш, шунингдек, улар билан боғлиқ хавфларни бартараф этиш бўйича тизимли иш олиб бормоқда.
Агентлик мутахассислари Интернетда мониторинг олиб бориши жараёнида крипто-активлар билан боғлиқ операциялар ниқоби остида фуқаролар маблағини йиғадиган ва “молиявий пирамида” хусусиятларига эга бўлган “LIONSGATE” лойиҳасининг фаолиятини фош қилишди. Ушбу лойиҳа ташкилотчилари Ўзбекистон Республикасида крипто-активлар соҳасида фаолият юритиш учун лицензияга эга эмаслар. Агентлик бу ҳолат бўйича ҳуқуқни муҳофаза қилиш органларига тегишли мурожаат юборди.
Эслатиб ўтамиз, Ўзбекистон Республикаси «Лицензиялаш, рухсат бериш ва хабардор қилиш тартиб-таомиллари тўғрисида»ги Қонуни ва Ўзбекистон Республикаси Президентининг 2018 йил 3 июлдаги ПҚ-3832-сон қарорига мувофиқ, крипто-активлар айланмаси соҳасидаги фаолиятни амалга ошириш учун белгиланган тартибда лицензия олган фақат Ўзбекистон Республикасининг резидентлари – юридик шахслар крипто-активлар соҳасида хизмат кўрсатиши мумкин. Бундай провайдерлар турларига “крипто-биржа”, “майнинг-пул”, “крипто-депозитарий” ва “крипто-дўкон” киради (лицензия олган шахслар реестри Агентлик веб-сайтида мавжуд).
Шунингдек, Агентлик 2023 йил 1 январдан бошлаб Ўзбекистон Республикаси фуқаролари ва юридик шахслари крипто-активларни сотиб олиш, сотиш ва (ёки) айирбошлаш бўйича операцияларни фақат миллий провайдерлар орқали қонунчилик ҳужжатларида белгиланган тартибда амалга оширишлари лозимлигини эслатиб ўтади. Крипто-активлар билан операцияларни белгиланган тартибни бузган ҳолда амалга оширганлик учун маъмурий ва жиноий жавобгарлик белгиланган.
Фуқароларни ниҳоятда ҳушёр бўлишга чақирамиз!
Идоравий мансуб ташкилотлар
