Ўзбекистон Республикаси Истиқболли лойиҳалар миллий агентлиги -
крипто-активлар айланмаси, капитал бозори, суғурта, электрон тижорат, лотерея ташкил этиш ва букмекерлик фаолияти соҳаларини тартибга солиш, лицензиялаш ва рухсат бериш тартиб-таомилларини амалга ошириш бўйича ваколатли давлат ташкилоти.
Истиқболли лойиҳалар миллий агентлигида Hong Kong Economic and Trade Office in Dubai (HKETO Dubai) — Хитой Халқ Республикаси Гонконг махсус маъмурий ҳудуди Ҳукуматининг Яқин Шарқ мамлакатларидаги расмий ваколатхонаси делегацияси билан учрашув бўлиб ўтди.
HKETO Dubai делегациясига Гонконгнинг Дубайдаги иқтисодий ва савдо масалалари бўйича бош директори Саймон Чан бошчилик қилди. Делегация таркибидан, шунингдек, бош директорнинг биринчи ўринбосари Лео Пун, иккинчи ўринбосари Жексон Вонг ҳамда ижроия ёрдамчиси Агния Федорова ўрин олди.
Учрашув давомида томонлар капитал бозори, крипто-активлар айланмаси соҳаларидаги ҳамкорликнинг истиқболли йўналишлари, Агентликнинг Гонконгнинг тегишли тартибга солувчи органлари билан ҳамкорлигини йўлга қўйиш, шунингдек, Ўзбекистон ва Гонконг компаниялари ўртасидаги ҳамкорликни ривожлантириш масалаларини муҳокама қилдилар.
Учрашув якунида томонлар ҳамкорликни янада ривожлантириш бўйича аниқ қадамларни белгилаб олдилар.
