Oʼzbekiston Respublikasi Istiqbolli loyihalar milliy agentligi

3 iyun kuni O‘zbekiston Respublikasi Istiqbolli loyihalar milliy agentligi (Agentlik), PraeLegal Uzbekistan va Heemera kompaniyasi hamkorligida tashkil etilgan “Crypto Week Uzbekistan” tadbiri o‘z ishini boshladi.

Crypto Week Uzbekistan har yili o‘tkazilib, tartibga soluvchi organlar va biznes vakillari ishtirokida kripto-aktivlarning dolzarb muammolari va tendensiyalarini muhokama qilish uchun platformani taqdim etadi.

Agentlik direktorining birinchi o‘rinbosari Vyacheslav Pak tadbirning ochilish marosimidagi nutqida ta’kidladi:

“Bugun g‘urur bilan aytishimiz mumkinki, davlatimiz rahbarining qo‘llab-quvvatlashi va siyosiy irodasi tufayli O‘zbekiston kripto-aktivlar faoliyati uchun normativ-huquqiy va institutsional asos yaratilgan noyob platformaga aylandi.

...

Albatta, O‘zbekistonda kriptoindustriyani rivojlantirishdan ko‘zlangan asosiy maqsad mamlakatimizning investitsion jozibadorligini oshirish, mahalliy va xorijiy investitsiyalarni jalb etishning yangi shakl va usullarini joriy etishdan iborat bo‘lib, bu barqaror iqtisodiy o‘sishni ta’minlash va fuqarolarimiz farovonligini oshirishga qaratilgan".

Taxminan 200 ishtirokchi - tadbirkorlar, investorlar, ishlab chiquvchilar va faollar - kripto-aktivlar va blokcheynning cheksiz imkoniyatlarini o‘rganish va bilim almashish uchun Crypto Week doirasida yig‘ildi.

Tadbir mazmunli panel muhokamalari, master-klasslar, innovatsion loyihalar taqdimotlari, kriptosferadagi mutaxassislar o‘rtasida aloqa o‘rnatish imkoniyatlari, yetakchi kriptokompaniyalarning eksklyuziv taqdimotlarini o‘z ichiga oldi.