“O‘zbekiston-2030” Strategiyasida barqaror iqtisodiy o‘sish maqsadlaridan biri sifatida mamlakatning investitsiyaviy jozibadorligini yanada oshirish, jumladan, qimmatli qog‘ozlar bozorini jadal rivojlantirish belgilangan.

Mamlakatimizda amalga oshirilayotgan keng ko‘lamli islohotlar doirasida hamda kapital bozorini keng rivojlantirish maqsadida O‘zbekiston Respublikasi Istiqbolli loyihalar milliy agentligi tomonidan Qimmatli qog‘ozlar bozorida anderrayting faoliyati to‘g‘risidagi nizom (keyingi o‘rinlarda – “Nizom”) tasdiqlandi va O‘zbekiston Respublikasi Adliya vazirligi tomonidan 2025 yil 28 fevralda 3610-son ro‘yxat raqami orqali ro‘yxatga olingan.

Nizom bilan qimmatli qog‘ozlar bozorida anderrayting faoliyatini amalga oshirish tartibi, shuningdek, qimmatli qog‘ozlarni chiqarish va (yoki) joylashtirishda emitent va anderrayterning o‘zaro munosabatlari asoslari belgilanmoqda.

Nizom bilan quyidagi asosiy qoidalar belgilanadi:

• anderrayting faoliyati va uni tashkil etish tartibi;
• anderrayterlarning vaqtinchalik birlashmasi;
• anderrayting xizmatlari ko‘rsatish to‘g‘risidagi shartnoma;
• anderrayter faoliyatini nazorat qilish.

Nizomga muvofiq, anderrayting faoliyati investitsiya vositachilari va tijorat banklari tomonidan amalga oshiriladi.

Bunda, anderrayting faoliyatini amalga oshirish uchun:

• investitsiya vositachilari qimmatli qog‘ozlar bozorini tartibga solish bo‘yicha vakolatli davlat organi tomonidan berilgan investitsiya vositachisi sifatida faoliyatni amalga oshirish huquqini beruvchi litsenziyaga;
• tijorat banklari esa O‘zbekiston Respublikasi Markaziy banki tomonidan berilgan bank faoliyatini amalga oshirish huquqini beruvchi litsenziyaga ega bo‘lishi lozim.

Emitent va anderrayter o‘rtasidagi qimmatli qog‘ozlarni joylashtirish jarayonidagi o‘zaro munosabatlar ular o‘rtasida tuzilgan anderrayting xizmatlarini ko‘rsatish to‘g‘risidagi shartnoma bilan belgilanadi.